قالوا ليه : نوض تخدم
قال ليهم : علاش؟
قالوا ليه : باش دير الدار
قال ليهم : علاش؟
قالوا ليه : باش تزوج
قال ليهم : علاش؟
قالوا ليه : باش دير وليدات
قال ليهم :علاش؟
قالوا ليه : باش يخدموا عليك
قال ليهم :علاش؟
قالوا ليه : باش ترتاح
قال ليهم : راني هاكا مرتاح، علاش ندور هاد الدورة كاملة؟
هادا واحد المكلخ ساقط أربع سنين فالتحضيري.
جا عندو المدير، قال ليه: واش نتا غادي تبقى غي لاصق ليا ف هاد المدرسة؟
ناض الدري كعا، هز شكارتو وخرج. قال ليهم: لهلا يداوي بوكم.
كان معول يولي طبيب.
واحد جاتو الفاكتورة ديال الما غالية بزاف
عيط للشركة ديال الما قال ليهوم: أهياوينا، ياكما الشتا هاد العام على حسابي؟
هادا واحد خينا مبوق مع راسو، وجاه البرد بزاف
ملي شعل العافية ودفى مزيان، عجبو الحال، وهو يقول: الله! لهلا يحرمنا منها لا دنيا ولا آخرة.
واحد المرا طلعات للطوبيس هازة ولدها الصغير
شاف الشيفور ف ولدها وقال ليها: هادا أخيب ولد شفتو ف حياتي
المرا طلعات للطوبيس غضبانة وبقى فيها الحال بزاف
جلسات حدا واحد الراجل وقالت ليه: هاداك الشيفور قلل من قيمتي
قال ليها الراجل: سيري ليه وطلبي منو يعتادر ليك، وأنا غادي نشد ليك القرد ديالك
هادا واحد الراجل كاري، وكان السقف ديال الخشب بالي وكيدير الصداع بزاف
ملي جا مول الدار يتخلص الكرا، قال ليه الكاري: خويا صاوب لينا هادا السقف، راه كيخلعنا
قال ليه مول الدار: ما تخافش، راه غير كيسبح الله
قال ليه الكاري: راني خفت يجيه الخشوع ويسجدهادا واحد الراجل كاري، وكان السقف ديال الخشب بالي وكيدير الصداع بزاف
ملي جا مول الدار يتخلص الكرا، قال ليه الكاري: خويا صاوب لينا هادا السقف، راه كيخلعنا
قال ليه مول الدار: ما تخافش، راه غير كيسبح الله
قال ليه الكاري: راني خفت يجيه الخشوع ويسجد
واحد المكلخ مشى يشري صباط.
سولو مول المحل: شحال كتلبس ف رجليك؟
قال ليه المكلخ: جوج فردات.
هادي واحد المرا شارفة طلعات للكار.
قالت ليهم وكلوني، وكلوها...
قالت ليهم تكيوني، تكاوها...
ناض واحد الشارف، وقال ليهم: هبطوني ...
قالوا ليه : علاش الحاج؟ ياك ما كاين باس؟
قال ليهم : خايف تزيد تقول زوجوني، تلصقوها فيا.
رأى ثعلب غرابا فوق الشجرة وبفمه قطعة من الجبن...
فقال الثعلب: أيها الغراب غن لي، إن صوتك جميل !
فوضع الغراب قطعة الجبن تحت جناحه وقال: سير ألحمار، يحساب ليك أنا هاداك الغراب المكلخ اللي قراوكم ف التحضيري؟
خضار و جزار تخاصموا على البلاصة في السوق. الجزار ضرب الخضار بكيلو وهو يسخف.
جا الإسعاف دا الخضار للصبيطار،و ملي فاق لقى الفرامليا لابسين الطابليات دايرين بيه.
وهو يقول ليهم: وا شهدوا عليه أمالين صيكوك، واشهدوا عليه أمالين صيكوك
واحد مبوق جالس ف القسم، كل شوية كيضحك
ف التالي ضحك واحد الضحكة بالجهد
قال ليه المعلم: نتا مالك واش تسطيتي؟
قال ليه المبوق: راه كنت كنعاود لراسي النكت، واخر وحدة أول مرة نسمعها
هادا واحد مكلخ دخل يدوز الامتحان
خرج ليه واحد السؤال كان موجد ليه النقيل
ناض المكلخ لصق ف ورقة الامتحان النقيل اللي كان موجدو
هادا واحد تابع وحدة، وبدا عليها: ما نشوفوكش أزين، حنا عندنا الديور، وعندنا المحلات، وعندنا الطوموبيلات...
دارت البنت وغير بانت ليه خايبة، وهو يقول ليها: ولكن خسارة، بعنا كلشي
هادا واحد الراجل عرض على صحابو للغدا، وحط ليهوم طبسيل ديال العدس.
قال ليهوم: كولوا العدس راه مزيان فيه الحديد
تكاو عليه هاك بالاك، هاك بالاك، هاك بالاك، حتى فضاو معاه
قالوا ليه: زيدنا واحد طبسيل آخر
هاداك الراجل تعقدات ليه، ماكانش معول على جوج طباسل
مشى عمر ليهوم الطبسيل بالمسامر وقال لصحابو: كولو الحديد راه فيه العدس
هادا واحد سكران حرق الضو الحمر
وقفو البوليسي وقال ليه: آ سي راك دزتي ف الضو الحمر
قال ليه السكران: وماشي شي حمورية نيت
مبوق سول صاحبو: شحال ف الساعة؟
قال ليه صاحبو: الخمسة وخمسة
قال ليه المبوق: ما تعرفش تقول عشرة؟
هادا واحد صيفت ولاد يعيشوا مع عائلة ميريكانية باش يتعلموا الانجليزية
ملي داز عام، مشى الراجل للميريكان يجيب ولادو
دق على دار العائلة الميريكانية، و حلات ليه المرا الباب
قال ليها بالانجليزية : where are ze childrens?
قالت ليه بالدارجة : دخل دخل، راهوم كينقزو ف الجردة بحال القرودا
الثلاثاء مايو 22, 2018 8:30 am من طرف REDA BOUNAIM
موضوع: nokat rai3a 
